Триаголник на здравјето

Зборот здравје има многу различни дефиниции, коишто биле употребувани за различни цели со текот на времето. Но генерално, кога  велиме здравје, тоа се однесува на физичка и емотивна благосостојба, особено поврзана со нормално функционирање на телото, и отсуство на болест, болка или повреда.

Уште една интересна дефиниција е: целосна физичка, ментална и социјална благосостојба, и не само отсуство на болест.

Кои се трите основи коишто ни ја даваат оваа состојба?

• Добра исхрана
• Добро вежбање или физичка активност
• Добар сон

Многу често, се запоставува една или повеќе од овие основи, но тие се взаемно поврзани и влијаат една на друга. Замислете ги како еден триаголник каде што ако едниот агол се подобри и зголеми, и другите два се подобруваат и зголемуваат истотака, и обратно, ако едниот се влоши и намали, и другите два се влошуваат и намалуваат. Така да, многу тешко, а и скоро невозможно е да се постигнат долгорочни резултати или цели доколку не работиме на подобрување на сите три основи.

Примери:

• Доколку добро извежбате, многу веројатно е дека подобро и ќе спиете, а со тоа и телото и хормоните ќе функционираат подобро што ќе ве натера да имате подобар избор при исхраната и подобро ќе се храните.
• Доколку лошо спиете, нема да имате многу енергија за вежбање и соодветен опоравок, и вежбањето дури може да направи контра-ефект, и за телото да ја надокнади таа енергија и поради лачење на хормони на стрес, ќе бара брза енергија како шеќери, премногу јагленихидрати, итн. Дополнително, ако пиете повеќе кафе поради тоа, уште повеќе ќе се влошуваат хормоните и сонот, а со тоа и тренингот/вежбањето и исхраната.
• Доколку навечер изедете цела пица и легнете да спиете, дури и да спиете повеќе часови, најверојатно нема да се разбудите свежи и наспани, а со тоа потешко ќе ви оди со вежбањето или физичката активност.

Од овие примери можеме да видиме како овие три работи се взаемно повразни и влијаат една на друга и доколку сакаме ЗДРАВЈЕ на долг рок, мораме да работиме на подобрување на сите три бидејќи доколку една заостанува, можеби ќе имаме краткорочни подобрувања, но на долг рок тоа нема да биде одржливо.

Па затоа, почнете од една точка и подобрувајте ја, па потоа постепено и чекор по чекор, заедно подобрувајте ги и останатите. Тоа не мора да бидат некои големи промени, туку мали промени, една по една, кои со тек ан време ќе направат огромна разлика.

Како на пример:

• намалете го шеќерот и процесираната храна
• намалете колку кафиња пиете на ден, доколку пиетее 3-4, постепено преминете на 1-2
• легнете си малку порано и наспијте се малку подолго
• почнете да вежбате и да се движите почесто на ниво коишто се чувствувате добро.

Ние во ATG, ви стоиме целосно на располагање за вежбањето, каде што ве водиме точно низ процесот и скалата на способност без болка. За другите две можеме да ви помогнеме, да ви дадеме совети, да ве насочиме, но најмногу зависат од вас.

Дознај повеќе за АТГ на следниот линк – https://atgmacedonia.com/

Подготвил: Бојан Диков