Што значи фитнес и до кога треба да вежбам?

Го слушаме зборот ФИТНЕС многу често во денешно време, но што навистина значи?

Ајде да ги видиме овие 2 дефиниции на зборот фитнес:

• состојбата кога сте физички силни и здрави (именка)
• кога сте здрави и силни доволно за да извршувате тешка физичка работа или да играте спорт (именка)
  
  Па, како што може да видите, под фитнес не се подразбира да имате големи мускули или видно изразени абдоменални мускули. Фитнесот е да се биде здрав, доволно силен и мобилен за да можете да ги извршувате секојдневните физички активности или спорт. Не мора да значи дека треба да имате ГОЛЕМИ мускули за да бидете фит. Тоа зависи од целта и тоа што сакате да го правите, НО главниот фокус треба да е на ЗДРАВЈЕТО.

Во денешно време, многу често на фитнесот се гледа главно како алатка за добар изглед, но делот здравје е запоставен и има многу “фит” луѓе наоколу коишто имаат повреди, болки и други неповолни состојби со телото кои што ги онеспособуваат да прават физички активности, да се здрави и да спортуваат.

Како тоа човек што не дигнал тег во животот е поздрав од човек што неделно троши часови и часови во вежбање? Најчестата причина е фокусот само на физичкиот изглед, а не да бидеш здрав и доволно силен за да правиш физички активности.

Ако фокусот на вежбањето е здравје и балансирано вежбање според вашите цели и потреби, добриот изглед ќе дојде посекако, како споредна работа, бидејќи вие ќе можете да продолжите да вежбате и секојдневно да сте физички активни и да спортувате.

Ако вежбате само за да изгледате добро, здравјето и балансираното вежбање не секогаш е запазено, поради обсесивност за подобар изглед, и доаѓа до одредени болки и повреди коишто се резултат на дисбалансирано вежбање. На пример, ако претерано правите вежби за абдоменалните мускули, но притоа не правите исто толку вежби и за грбот и останатите делови од телото, доаѓа од пореметување на структурата на телото, и тоа си носи одредени проблеми.

Затоа, мојот совет, според моето досегашно 15-годишно искуство е да го гледате фитнесот и вежбањето како алатка за здравје, сила и мобилност за да бидете способни да правите физички активности секојдневно и непрекинато со години, и добриот изглед којшто секако ќе се случи е бонус!

Кога главниот фокус на фитнесот нема да биде големи мускули и задници, потрошени калории и килограми, и ќе биде здравје, движење, енергија и долговечност, тогаш ќе предизвикува вистинска физичка и ментална промена кај луѓето.

Првото, ќе предизвикува фрустрации, незадоволство од сопственото тело, дисбаланс во телото посветувајќи се повеќе на еден дел.

Второто, е тоа што вистински значи дефиницијата на зборот фитнес и како нашето тело е природно создадено да функционира.

И за крај, фитнесот не е нешто што започнува и престанува, вие не би престанале да се туширате некој ден само затоа што се чувствувате дека веќе сте чисти. Фитнесот е дел од водењето грижа за вашето тело кое после некое време станува навика и вежбањето секој ден со различен интензитет треба да стане дел од вашиот животен стил. Не мора секогаш да биде вежбање додека не ви се сврти или не се препотите, дури и пешачење и неколку лесни вежби дневно ќе направат разлика на долг рок. Ќе научите да уживате во тоа дури и ако никогаш не сте ни замислиле дека би можеле. Кога еднаш ќе ја осетите таа слобода и контрола врз вашето тело која што ја развивате со текот на времето, чувството е бесценето и не само што ја крева вашата самодоверба и ве прави да изгледате одлично, туку и прави се во животот да изгледа возможно и полесно.

Тоа е тајната за големи резултати и постигнувања. Ништо не се случува преку ноќ. Но, малите промени секој ден и секоја недела после одредено време прават огромна разлика. Се зависи од вас и од вашата одлука кога ќе започнете да ги менувате работите на подобро преку мали чекори секој ден и секоја недела.

Дознај повеќе за АТГ на следниот линк – https://atgmacedonia.com/

Подготвил: Бојан Диков