ЦЕЛУЛИТ

Во лето се актуелизира целулитот како естетски проблем. Со целулит се соочуваат 80-90% од жените без разлика на килограмите, кај мажите поретко се појавува. Естрогенот како женски хормон е виновен за натрупување на масните наслаги на стомакот и бутовите, кои со листовите и надлактиците се делови од телото каде најмногу се формира целулитот. Тој е резултат на  промени во кожата и поткожното ткиво, при што масните клетки  се групираат и на површината на кожата се видливи како јазли, испакнатини и вдлабнатини –  „кора од портокал“. Од пубертетот па во текот на животот целулитот се развива  во неколку фази:

• • Прва фаза    –  целулитот не е видлив, се гледа кога кожата ќе се штипне со прстите.
  • Втора фаза  –  целулитот не е видлив кога стоите, но се гледа под притисок кога седите.
  • Трета фаза  –  целулитот е видлив и може да биде и болен на допир.

Причини за појава на целулит:

• • неправилна исхрана
  • нездрав начин на живот (пушење и консумирање алкохол)
  • варирање на тежината
  • пореметување на метаболизмот
  • хормони (варирање на нивото на естроген во пубертет, бременост и менопауза)
  • генетски фактор
  • оштетена микроциркулација
  • тесна облека.

Количината на целулит=количина лоша исхрана+време кое го поминуваме седејќи

Како да си помогнеме?

Решението е во промена на животниот стил.

• Вежбајте. 30 минути физичка активност го поттикнува метаболизмот и исфрлање на токсините. Чучнувања, исчекор напред и на страна се вежби кои ќе ви помогнат во борбата со целулитот. Бидете упорни и истрајни, резултатите ќе бидат видливи.
• Подобрена исхрана. Исфрлете ја солената и масна храна, рафинирани производи, сосови, преливи, сè што содржи конзерванси, адитиви и емулгатори. Зеленчук, овошје, ленено семе, овес, јаткасти плодови, јајца, риба, немасно месо, магдонос нека бидат вашиот избор.
• Пијте 3 литри вода на ден.
• Антицелулитна масажа. Масажата е важна во борба со целулитот. Долги движења од глуждовите кон бутовите, штипкање и масажа со кружни движења ја подобруваат лимфната дренажа.

Антицелулитни препарати

Постои широка палета производи за помош во борбата со целулитот. Најчесто се користат препарати кои содржат екстракт од бршлен, рузмарин, мента, арника, цимет, грејпфрут, костен, бреза, бозел, кофеин, карнитин. Активните состојки ја подобруваат микроциркулацијата, ја подобруваат лимфната дренажа, а со тоа и поефикасно ослободување од насобраните токсини или ги разградуваат поткожните масни наслаги. Најдобар ефект се постигнува со производи со двојно дејство. Производите можеме да ги поделиме на оние кои ладат и кои имаат загревачки ефект.

Препаратите кои ладат се попријатен избор, не предизвикуваат црвенило како препаратите кои греат. Погодни се за употреба и при проблеми со циркулација. Дополнително олеснуваат симптоми кај уморни и отечени нозе. Препаратите со морски алги и глина го забрзуваат метаболизмот, изобилуваат со минерали и соли кои ја хранат кожата и овозможуваат размена на материи. Глината има улога да ги впива токсините.

Иновативен производ кој содржи ефикасен ензим мукополисахаридаза има докажано дејство. Активната супстанција ја разградува основната состојка на поткожното сврзно ткиво на мукополисахаридни нишки каде се задржуваат масните клетки, водата и минералните соли. Го омекнува и колагенот и го прави поткожното ткиво поеластично и пропустливо за материи кои го прават целулитот видлив. Може да се употребува и во бременост.

Производите се нанесуваат двапати дневно најдобро по туширање кога кожата подобро ги впива активните состојки. Кожата станува понежна, затегната, хидрирана, а изгледот на портокалова кожа е ублажен. Ефектот е видлив за 2-3 недели редовна употреба. Започнете денес, бидете упорни и истрајни. Резултатот нема да изостане.